رضا رضا حسینی مقدم
ایسته میرم یار آغلاسین
چال تاری قوی تار آغلاسین،
گول اویناسین خار آغلاسین
بوغاز گولسون دارآغلاسین،
قوی یئره غم پیاله سین
سیل گوزونون شلاله سین،
آل گونشین حواله سین
شاخ قارا قوی قار آغلاسین،
یار ندن آغلاسین گرك؟
بویون بوكولسون آی فلك،
دویونجا قویمادین گولك
سیخ ناری قوی نار آغلاسین،
خزان یئلی اسن زامان
شاختا آمان كسن زامان،
یار یاریلان كوسن زامان
كیمسه كیمیم وار آغلاسین،
صبحه تیكیلدی گوزلریم
داغلاری آشدی سوزلریم،
گیزلین الوودی كوزلریم
نی اولدو نی زار آغلاسین،
ساقی گئتیر قدح لرین
سرخوش اولاق درین درین،
سئوگی توتا كینین یئرین
كین اوزو زار زار آغلاسین…
استاد شهریار
